Şərqlə Qərbin, fərqli sivilizasiyaların və mədəniyyətlərin qovuşuğunda yerləşən Azərbaycan geopolitik imkanları və zəngin tarixi-mənəvi irsi ilə regionun aparıcı gücünə çevrilib. Bu gün Bakıda müxtəlif xalqların nümayəndələrini bir araya gətirən mötəbər beynəlxalq tədbirlərin keçirilməsi təsadüfi xarakter daşımır. Türk dünyasının ayrılmaz hissəsi və Qafqazın aparıcı dövləti olan ölkəmiz sülhün və təhlükəsizliyin real təminatçısı kimi çıxış edir.

Milli Məclisin deputatı Kamal Cəfərov qeyd edib ki, dövlətimizin yürütdüyü müstəqil siyasət və milli-mənəvi dəyərlərə söykənən strategiya ölkəmizi beynəlxalq müstəvidə vahid birləşdirici mərkəzə çevirib:

“İslam aləmində və ətraf regionlarda cərəyan edən mürəkkəb proseslər fonunda Azərbaycanın ortaya qoyduğu praktiki həmrəylik modeli xüsusi əhəmiyyət kəsb edir. Bir tərəfdən Türk dövlətlərinin və Qafqaz xalqlarının dini-mənəvi liderlərinin Bakı görüşləri, digər tərəfdən isə İslam Əməkdaşlıq Təşkilatının qarşıda duran Zirvə Görüşünə ev sahibliyi etməyimiz dövlətimizin barışdırıcı, konstruktiv missiyasının təzahürüdür. Biz müsəlman dünyasını, eləcə də region xalqlarını vahid sülh və əməkdaşlıq platformasında toplamaq iradəsi nümayiş etdiririk. Qlobal miqyasda qütbləşmənin dərinləşdiyi bir vaxtda Bakıdan verilən birlik və barışıq mesajları bütövlükdə regional sabitliyə xidmət edir”.

Deputat vurğulayıb ki, beynəlxalq qurumların uzun illər ərzində nümayiş etdirdiyi ikili standartlar və haqsız mövqelərə baxmayaraq, Azərbaycan öz milli ləyaqətini və suverenliyini qətiyyətlə qoruyaraq tarixi ədaləti bərpa etmişdir:

“Otuz illik işğal dövründə beynəlxalq təşkilatların və bəzi Qərb mərkəzlərinin sərgilədiyi müşahidəçi mövqe, tətbiq olunmayan qətnamələr və mənəvi-mədəni irsimizin dağıdılmasına göz yumulması acı bir həqiqətdir. Lakin Azərbaycan xalqının güclü iradəsi, milli birliyi və hərbi-siyasi gücü sayəsində torpaqlarımız azad edildi, suverenliyimiz tam bərpa olundu. Bu gün azad edilmiş ərazilərimizdə sürətlə aparılan bərpa və quruculuq işləri dövlətimizin milli-mənəvi irsə verdiyi yüksək dəyərin bariz nümunəsidir. Biz qazandığımız parlaq zəfərdən sonra da məhz sülh və quruculuq yolunu seçməklə region üçün yeni bir inkişaf səhifəsi açdıq. Qərbdəki bəzi dairələrin ölkəmizə qarşı yürütdüyü qərəzli kampaniyalara, islamofobiya təzahürlərinə və məqsədli təzyiq cəhdlərinə baxmayaraq, Azərbaycan öz yolundan dönməyəcək. Bizim əsas hədəfimiz milli maraqlarımızı, mənəviyyatımızı və regional sülhü sarsılmaz etməkdir”.