Prezident İlham Əliyevin “Konstitusiya və Suverenlik İli” münasibətilə amnistiyanın elan edilməsi təşəbbüsü müasir Azərbaycan dövlətçiliyinin humanist və hüquqi mahiyyətini aydın şəkildə əks etdirən mühüm siyasi addımdır. Bu təşəbbüs ölkəmizdə dayanıqlı inkişafı təmin edən dövlətçilik ənənələrinin ardıcıl şəkildə davam etdirildiyini göstərir. Məlum olduğu kimi, “Azərbaycan xalqının Ümummilli Lideri Heydər Əliyevin siyasi iradəsi və xilaskarlıq missiyası nəticəsində müstəqil Azərbaycan dövləti qurulmuş və möhkəmlənmişdir. Ulu Öndərin rəhbərliyi ilə qəbul edilən Azərbaycan Respublikasının Konstitusiyası müasir dövlətçiliyimizin hüquqi təməlini formalaşdırmışdır. Bu möhkəm təməl üzərində qurulan dövlət siyasəti bu gün Prezident İlham Əliyev tərəfindən uğurla və qətiyyətlə davam etdirilir”.

Milli Məclisin deputatı Kamal Cəfərov bildirmişdir ki, amnistiya təşəbbüsünün ideoloji əsasını Prezident İlham Əliyevin dövlət siyasətində xüsusi yer tutan humanizm prinsipi təşkil edir. “Humanizm Prezident İlham Əliyevin həyata keçirdiyi dövlət siyasətinin əsas ideoloji dayaqlarından birini təşkil edir. Dövlət başçısının siyasi fəaliyyətinin mərkəzində insan amili, vətəndaş rifahı, sosial ədalət və mərhəmət prinsipləri dayanır” fikri bu yanaşmanın mahiyyətini dolğun şəkildə ifadə edir . Deputatın sözlərinə görə, cinayət-hüquq siyasətində humanizmin əsas prinsip kimi qəbul edilməsi cəmiyyətin sağlamlaşmasına və hüquqa inamın möhkəmlənməsinə xidmət edir.

Kamal Cəfərov vurğulamışdır ki, Prezident İlham Əliyevin amnistiya təşəbbüsü həm də ümumbəşəri humanizm dəyərlərinə sadiqliyin bariz nümunəsidir. Xüsusilə qeyd edilməlidir ki, “Suverenliyimizin bərpasının, Konstitusiyamızın ali hüquqi qüvvəsinin ölkəmizin bütün ərazilərində bərqərar olunmasının xalqımızın ən böyük tarixi qələbəsi olduğunu nəzərə alaraq, humanizm və mərhəmət ənənələrinə sadiq qalaraq… Prezident İlham Əliyev 15 dekabr 2025-ci ildə amnistiya elan edilməsi təşəbbüsünü irəli sürüb” . Bu qərar dövlətin gücünün cəza sərtliyində deyil, ədalət və mərhəmətdə olduğunu bir daha nümayiş etdirir.

Deputat diqqətə çatdırmışdır ki, amnistiya aktının şamil olunacağı şəxslər dairəsi də sosial ədalət prinsipinin real təzahürüdür. Layihəyə əsasən “Azərbaycan Respublikasının suverenliyinin və ərazi bütövlüyünün qorunması uğrunda aparılan döyüş əməliyyatlarında, o cümlədən Vətən müharibəsində və 2023-cü il sentyabrın 19–20-də keçirilmiş antiterror əməliyyatında iştirak etmiş şəxslərin, eləcə də … qadınların, 60 yaşına çatmış şəxslərin, cinayət törədərkən yetkinlik yaşına çatmayanların və digər şəxslərin cəzadan və ya cinayət məsuliyyətindən azad edilmələri nəzərdə tutulur” . Bu yanaşma dövlətin həm qəhrəmanlıq göstərmiş vətəndaşlara, həm də həssas sosial qruplara olan diqqətinin göstəricisidir.

Kamal Cəfərovun fikrincə, təşəbbüsün miqyası onun tarixi əhəmiyyətini daha da artırır. Prezident İlham Əliyevin təklifi sayəsində amnistiya aktı tətbiq ediləcəyi şəxslərin, o cümlədən azadlıqdan məhrum etmə cəzasından azad ediləcək məhkumların sayına görə ən böyük amnistiya olacaq və ümumilikdə 20 mindən çox şəxsə şamil ediləcəyi gözlənilir. Bu fakt Azərbaycan dövlətinin güclü və özünəinamlı olduğunu, eyni zamanda humanist dəyərlərə sadiq qaldığını göstərir.

Deputat sonda qeyd etmişdir ki, ötən illər ərzində həyata keçirilmiş 12 amnistiya və 71 əfv təşəbbüsü Prezident İlham Əliyevin və Ümummilli Lider Heydər Əliyevin müəyyənləşdirdiyi siyasi xəttin ardıcıl davamı kimi qiymətləndirilməlidir. Onun sözlərinə görə, bu siyasət hüquqi dövlət quruculuğunu daha da möhkəmləndirir, cəmiyyətdə ədalət, mərhəmət və dövlətə inam hissini gücləndirir və Azərbaycanın gələcək inkişafına möhkəm mənəvi-hüquqi zəmin yaradır.