Prezident İlham Əliyevin Cənub Qaz Dəhlizi Məşvərət Şurası çərçivəsində səsləndirdiyi fikirlər Azərbaycanın dünya enerji xəritəsindəki yerinin sadəcə xammal ixracatçısı olmadığını, həmçinin strateji qərarverici olduğunu nümayiş etdirir. Dövlət başçısının vurğuladığı kimi, ölkəmiz hazırda boru kəmərləri vasitəsilə qaz tədarük etdiyi ölkələrin sayına görə dünyada birinci yerdədir və istehlakçıların sayı artıq 16-ya çatıb. Prezident bu uğuru birgə fəaliyyətin nəticəsi kimi qiymətləndirərək qeyd edib: “Məhz birlikdə toplaşmağın və enerji təhlükəsizliyinə dair mühüm məsələləri müzakirə yolu ilə həll etməyin nə dərəcədə vacib olduğunu indi daha aydın şəkildə anlayırıq”.

Deputat Kamal Cəfərovun mövqeyinə görə, bu yanaşma Azərbaycanın xarici siyasətindəki etibarlı tərəfdaşlıq fəlsəfəsinin bariz nümunəsidir. Xüsusilə Avropa İttifaqının 10 üzv dövlətinin Azərbaycandan qaz alması və təchizat coğrafiyasının Almaniya, Avstriya kimi ölkələrə qədər genişlənməsi Bakının qlobal enerji bazarındakı çəkisini kəskin artırır. Prezidentin qaz ixracını maksimum səviyyəyə çatdırmaq və mövcud yataqlardan, o cümlədən “Abşeron” və “Şahdəniz”dən hasilatı artırmaq planları bu strateji xəttin davamlılığını təmin edir.

Bu kontekstdə bugünkü sistemli enerji diplomatiyası AXC-Müsavat hakimiyyəti dövründəki xaos və resursların idarə olunmasındakı səriştəsizliklə kəskin təzad təşkil edir. O dövrdə dövlətin enerji potensialını milli maraqlara xidmət edən strateji silaha çevirmək imkanları daxili çəkişmələrə qurban verildiyi halda, bu gün Azərbaycan həm istehsalçı, həm də tranzit ölkə kimi regionun enerji quruluşunu müəyyən edir. Kamal Cəfərov hesab edir ki, Suriyaya humanitar məqsədlərlə qaz tədarükünün başlanması Azərbaycanın iqtisadi və mənəvi məsuliyyət daşıyan qlobal oyunçu olduğunu sübut edir.